MATWALI

Pic Credit: Google Images

Iss paar chalu, uss paar chalu, kiss paar chalu?

Matwali hu matwalon ke sath chalu|
Nadi kabhi, bandhi batao…
Phir mujhse kyu umeed lagao? 

Pahadon se takrati, ache bure sabko apnati…
Kal-kal behti bas sagar per rukti|
Phir, main ruku, ye jatan kyu kerte ho…
Mere hisse ke pahadon se kyu darte ho?

Kal-kal kerti beh jaungi, ek din apne sagar mein mil jaungi.
Matwali hu matwalon ke sang jaungi|
 

Dekha kabhi chakor ko tumne…
Ek jhalak chand ki pane ko matwala voh janmon se|
Tum hanste ho voh rota hai…
Tum kehte ho chand dur bahut hai, voh kehta ek jhalak bahut hai.
 

Mujh mein thodi si sudh-budh hai baki …
Par sach kehti hu, ek din, chakor main ho jaungi.
Tum mujh par hasna beperwah ho kar…
Main apne chand mein kho jaungi.
 

Matwali hu matwalon ke sang jaungi|
 

Pagal kaisa voh panchhi hai, Chatak jisko kehte hain…
Nadi-sagaron per udhta phir bhi pyasa mar jata hai.
Zidd kaisi ki pehli barish se pyaas bujhe…
Jab sare jal hain ek jaise? 

Soojh-bhoojh ke mare ho tum…
Uss matwale ko kya samjho ge|

Voh mar kar pyaas bujhata hai…
Tum zinda ho kar bhi mar jate ho|
 

Uss zidd mein jeevan dikha hai mujhko…
Main toh Chatak sang ho lungi.
Tum kab samjhe the mujhko?

Jo ab ye na-samjhi mujhe satayegi.
 

Jab yaad karo bas keh dena…
Voh matwali thi matwalon sang chali gayi|